Giella Norsk - NorwegianGiella Sami - Samisk
A A A

Julevsáme varresvuodaterma

Jagen 2002 álgij Divtasvuona suohkan varresvuodatærmmaprosjevtav. Duogásj lij julevsáme varresvuodaterminologia ij gávnnu.
Prosjevtan li tjoahkkim termajt ma juo gávnnuji tjálalasj ja njálmálasj gáldojn. Duodden le posjekta hæhttum dahkat ådå termajt ma e julevsámegielan gávnnu. Terma li systematiseriduvvam rubmaha milta. Terma li biejaduvvam sierra sjiemájda gånnå li tjáleduvvam julevsámegiellaj, dárogiellaj ja latijnagiellaj. Svieriga Sámedikke vájnnodusá milta le duodden aj svierigadárogiellaj tjáledum.
 
Duodden dási li skihpudága snivva gåvvidum. Tjielggidum le skihpudagá namma, dille, sládja ja gånnå rubmahin le jus máhttelis.
 
Dát posjektarájddo le oassen prosessas man båhtusa galggi ságastallamgirjásj, julevsáme varresvuoda terma, julevsáme-dárogiela ja dárogiela-julevsáme medisijnalasj báhkogirjje, aktan kurssamateriála julevsáme dialogaj vuodon váj dárogielak varresvuoda- ja huksobargge bessi dajt ávkástallat.
Dát materiálla le aj CD:aj lågåduvvam. Girjátja vuodon lij muodugasj girjásj mij Kárásjågå suohkanin dagáduváj ja gæhttjaluváj moatte kursan 1996-97.
 
Didaktalasj kurssidahttijn guovte viehkkesujttárijs boahtteájggásasj åhpdibmáj dárogielak varresvuohta- ja sujttobarggijs bådij åvddån girjásj mij lij dagádum Kárásjågå suohkana girjátjijn vuodon, ittjij ållu gåbtjå materiálladábojt mij dá guoktán lij. Danen mierreduváj girjátjav vehi rievddadit. Materiálla vehi rievddaduváj ja le stuoreduvvam duola dagu muhtem dåjs åvdep termajs ja ådå materiálajn degu báhkolista ja dábálasj ságastallama sujttoaktijvuodan.
 
Girjásj ij le ållu gárves dálásj materiála milta. Åhpadiddje dán bargon libá læhkám Rolf Olsen ja Tor Magne Berg. Oasse kurssaájges le mannam ieme ságastallamgirjátjav hiebadahtatjit. Girje hiebadahttem le dagádum aktisasjbarggon åhpadiddjij ja oahppij gaskan – akta vehkkesujttár Ájluovtas ja nubbe Gásluovtas. Ulmme le åhpadiddje ja viehkkesujttára galggi akti ájn æjvvalit materiálav ållitjit. Ja de galggá gielalasj dåhkkidibmáj sáddiduvvat ja prienntiduvvat. De galggi kurssijiddje máhttet intensijva kurssimij validit gånnå suohkana ietjas bargge varresvuoda- ja huksosuorgen galggi bessat oahppat njálmálasj julevsámegielav .
 
Divtasvuona suohkan ja Jielleváre suohkan li aktan barggagoahtám sámegielak prosjevtaj gáktuj varresvuoda- ja huksosuorgen. Aktisasjbargo sisadno le kurssim ja tjálalasj viehkkenævoj åvddånibme degu kurssamateriála, parlørra ja medisijnalasj báhkogirjje.
 
Barggojuogos mij bargov jåhtuj biejaj lij:
 
Inga Karlsen
Evy Paulsen
Erling Urheim
Trond Åmo
Tor Magne Berg
Stig Eriksen
 
 
Barggo le dálla ietjá láhkáj organiseridum ja biejadum varresvuoda- ja sosialoajve Lill-Tove Hansena duohkáj. Udnásj prosjektabargge li:
 
Evy Paulsen
Almar Andersen
Tor Magne Berg
Rolf Olsen
 
 
Prosjekta le ruhtaduvvam rudáj Sámedikkes ja Varresvuoda- ja sosialdirektoráhtas ja dálla åtsåduvvá joarkka ruhtadum Sámedikkes ja Nordlánda fylkkamánnes.